19/05/2024 Censo de acuáticas na Frouseira

    Pois vai haber que ir á Frouseira cando chove! Esta mañá en dúas horas de mostraxe só cinco persoas atopadas no paseo peonil e cero cans. Insólito.

  O tempo tan chuvioso que estamos a ter non favorece a sedimentación de limícolas, das que había unhas cifras moi cativas. Desta volta censei tamén as anatídeas e outras aves reprodutoras. Imos cos dados do observado hoxe:

• 36 Patos cincentos (Mareca strepera). 21 machos + 15 femias. 
• 123 Lavancos reais (Anas platyrhynchos). 101 machos + 21 femias. Eu antes sempre tiña coma referencia o número de femias á hora de considerar a poboación reprodutora. Sen embargo José Souza comentou aquí a importancia de controlar eses grupiños de 3-5 machos, que considera coma exemplares reprodutores que xa abandonaron á femia. Tendo en conta que as 22 femias estaban case todas "emparelladas" calculo que habería arredor de 70-75 machos formando eses típicos grupiños pequenos dos que fala o mestre Souza e que el considera, se non entendín mal, coma exemplares desvinculados xa dunha femia reprodutora (corrixe o que proceda, Jose). En calquer caso, non observei nin unha soa rolada de femias con pitos, algo moi preocupante a estas alturas do ano e que insinúa un fracaso masivo nas nidadas por predación, mal tempo, etc.
• 3 Mergulletes comúns (Tachybaptus ruficollis). Sen indicios de cría, aínda. Os poucos polos que nacen adoitan aparecer entrado o verán, cando a lagoa está pechada e sen influencia mareal.
• 4 Galos de auga comúns (Fulica atra) agrupados na parte sur da lagoa. Reprodutor moito máis escaso e irregular có mergullete. Necesita un nível hídrico estable.
• 14 Píldoras cincentas (Pluvialis squatarola)
• 11 Píllaras reais (Charadrius hiaticula)
• 1 Píllara das dunas (Anarrhynchus alexandrinus)
• 1 Mazarico chiador (Numenius phaeopus)
• 1 Fuselo de rabo pinto (Limosa lapponica)
• 1 Bilurico das rochas (Actitis hypoleucos)
• 5 Virapedras comúns (Arenaria interpres)
• 2 Pilros grosos (Calidris canutus)
• 1 Pilro ferruxento (Calidris ferruginea). Quizá eran 2 tamén
• 41 Pilros tridáctilos (Calidris alba)
• 33 Pilros comúns (Calidris alpina)
• 2 Gaivotas patiamarelas (Larus michahellis)
• 30 Gaivotas escuras (Larus fuscus)
• 3 Corvos mariños grandes (Phalacrocorax carbo)
• 2 Garzas brancas pequenas (Egretta garzetta)
• 4 Cullereiros comúns (Platalea leucorodia)

Pilro ferruxento (Calidris ferruginea, en amarelo) e pilro groso (Calidris canutus, en laranxa) Un adulto portaba anelas de PVC pero bastante choio tiña co censo de anatídeas reprodutoras como para determe nestas cousas (máis secundarias desde o meu ponto de vista).