Lagoa da Frouxeira, censo completo 23 - 01

Hoxe fun á ría de Cedeira para botar unha mao co censo de águia pescadora (coordenado pola SGO en Galiza). Aproveitando que pasaba por alí achegueime antes á lagoa da Frouxeira, bastante tranquila a primeira hora da mañá.

Anatídeas na lagoa da Frouxeira, Valdoviño (A Coruña)

A lagoa está aberta, en óptimas condicións para a sedimentación, alimentación e repouso das aves.

Grupo de galiñolas (Fulica atra)

Nela puiden facer un censo case completo das súas acuáticas, que enumero de seguido:

2 Cisnes mudos (Cygnus olor). Especie moi fotoxénica mas invasora
4 Patos culler (Spatula clypeata)
167 Frisados (Mareca strepera)
3 Asubiadores (Mareca penelope)
434 Alavancos (Anas platyrhynchos). Cando estaba a realizar o conteo máis preciso houbo unha espantada. Penso que había arredor de 500 ex.
128 Cercetas reais (Anas crecca)
3 Patos chupóns (Aythya ferina). Pareceume ver tamén un pato de colar (Aythya collaris) mas finalmente resultou ser unha "galiña": un joyuyo deses do demonio.
104 Mergullóns pequenos (Tachybaptus ruficollis). Censo moi preciso, se acaso 5-10 ex máis
80 Galiñolas (Fulica atra)
0 Galiñas de río (Gallinula chloropus)
0 Rascóns (Rallus aquaticus) detectados
1 Bilurico das rochas (Actitis hypoleucos)
95 Gaivotas choronas (Chroicocephalus ridibundus)
Gaivotas comúns (Larus michahellis/fuscus)
+ Corvos mariños reais (Phalacrocorax carbo)
9 Garzas reais (Ardea cinerea)
5 Garzotas (Egretta garzetta)
9 Cullereiros (Platalea leucorodia)
1 Tartaraña das xunqueiras (Circus aeruginosus). Ao principio semellaba femia. Ollando as fotos aprécianse indicios dun ton cincento nas secundarias e na cola. Quizá era un macho subadulto (ou dous bichos diferentes, vaia).

Durante o tempo que botei a censar colleume o frío (no paseo peonil tardan moito en chegar os raios do sol por culpa do monte de Valdoviño). Xa cos dedos conxelados tentei sacar unhas fotos para ilustrar a entrada.