Lagoas de Begonte, 1ª parte. Aves.

  As lagoas de Riocaldo son un conxunto de humidais artificais naturalizados a partir de canteiras abandonadas no concello de Begonte (Lugo).


 "As do medio", como chamo eu, tiveron bastante importancia rexional como lugar de cría de anfibios e aves acuáticas durante uns anos ata que morreron, como tantos outros humidais galegos.


  Así e todo nestas alturas podemos alviscar algunha que outra especie ornitolóxica de interese, maiormente bichos en paso migratorio. O máis salientábel hoxe foron 2 Cercetas comúns e 4-5 Biluricos alinegros, que están agora en pleno pico de migración.



Tamén a primeira Folosa das xunqueiras do verán.


   Resulta incríbel como os nosos humidais, algúns deles cun grande potencial, semellan case mortos e baleiros de vida se os comparamos con espazos naturais equivalentes doutros territorios peninsulares. Penso nas típicas charcas de Salamanca ou Extremadura, cheas sempre de vida, e as comparacións son certamente odiosas.


   Pero aquí nin hai limícolas, nin anátidas, nin tartarugas,....nin anfibios! En toda a mañá apenas achei un metamórfico de Hyla e dous exemplares de perezi! E a culpa desta auténtica hecatombe biolóxica tena principalmente o Cangrexo vermello americán, que se suma á fortísima presión predatoria do Visón americán e de peixes alóctonos como o Black-bass, introducidos tamén polos pescadores (igual que o Cangrexo).
  Ver os encoros de Cecebre ou Sabón e as barreiras de Begonte baleiras completamente de anfibios é unha traxedia ecolóxica sen precedentes. Que aquí parece que o único "terrorismo ecolóxico" son os do Frente de Liberación Animal e as soltas de visóns, pero algúns pescadores e cazadores levan facendo "terrorismo" bastante máis tempo.


  Afortunadamente os Mergullóns cristados viñeron a Begonte para quedarse. Desde principios da década pásada é reprodutor nestas lagoas e noutros humidais do Norte galego


   Hoxe despacheime a gosto con unha familia relativamente confiada. Os 60-70 m. de distancia que había entre nós semellan menos unha vez editadas as fotos da SX60.








  Despois falaremos, como non, de libeliñas.