Levo anos buscando un lugar onde pasear tranquilamente e ao cal poda chegar camiñando desde casa ou, cando menos, facer poucos quilómetros no carro. O máis parecido é o val do Xuvia pero segue estando un pouco lonxe.
Cada ano que pasa gosto menos de conducir, por diferentes motivos. Agora comeza a mellor época para bichear, na cual tiña programada algunha excursión importante. Sen embargo é probable que finalmente quede por aquí. O sábado deixaba o veículo aparcado na rúa e saía dar unha camiñada polo O Alto do Castaño (1) (Narón), lugar onde nacín e vivín ata a adolescencia.
Vía da FEVE
Barrio da Solaina (Narón)
Cando fago camiñadas de catro ou cinco quilómetros (o dobre cando prosigo até San Pedro de Leixa) o equipo grande queda na casa, obviamente. Agora que vendín a Nikon P950 a única bridge que me queda é a Sony RX10 III, así que non teño moito onde escoller.
Solares sen edificar
Pola rúa que vai ata a ponte peonil sobre o FEVE hai moitas fincas e hortas abandonadas. Días atrás observara unha elevada densidade de rola turca (Streptopelia decaocto), algunhas pousadas moi confiadas. Precisamente nos xardíns daquelas casonas foi onde vira por primeira vez esta rula a mediados dos anos oitenta. Coa intención de fotografar a especie fun por aló o sábado.
Finca abandonada
Rúa Fonte da Cruz desde a ponte sobre o FEVE
Nesta ocasión non tiven tanta sorte e apenas puiden fotografar un par de turcas, a media distancia e con mala luz.
Rola torca (Streptopelia decaocto). Distancia: 45 m aprox
Sony RX10 III focal 600 mm ISO:1000 V:1/200 F:4
Por observacións persoais directas sei que as pegas rabilongas son predadoras das nidadas de pombo torcaz (Columba palumbus) e rolas turcas. Agora que comezou o período reprodutor de ambas especies as pegas vixían de maneira descarada os seus movimentos por se atopan os niños. Por certo que os niños destes colúmbidos son realmente cativos para o tamaño das aves.
O sábado unha parella de pegas foron directas canda a rola torca e quedaron xunto dela un bon pedazo. As intencións podo imaxinalas.
Rola torca vixiada por pegas rabilongas (Pica pica)
A estación reprodutora do pombo torcaz é amplísima, con presenza de voantóns mesmo en pleno inverno (observación persoal en Pontedeume). Este adulto acababa de levar unha poliña ao seu niño, situado nunha pequena árbore. Deixei que a colocara e logo lle tomei un par de fotos. Con ISO bastante alto, así que houbo que empregar a I.A. para redución de ruido.
Pombo torcaz (Columba palumbus)
Sony RX10 III focal 500 mm ISO:2500 V:1/250 F:4
Pombo torcaz (Columba palumbus)
Sony RX10 III focal 500 mm ISO:3200 V:1/250 F:4
E así terminamos por hoxe este post breve.
(1) O nome correcto é Alto do "Castiñeiro" ou "Castañeiro" mas nunca tal escoitei daquela e fáiseme moi raro pronuncialo así, a verdade. Quizá por ser unha forma máis longa.